ഗോവയോട് സമനിലയുമായി ബ്ലാസ്‌റ്റേഴ്‌സ് മൂന്നാം സ്ഥാനത്ത്

0
202

കേരള ബ്ലാസ്‌റ്റേഴ്‌സ് എഫ്‌സി 2 ഗോവ എഫ്‌സി 2

തിലക് മൈതാന്‍ സ്‌റ്റേഡിയം (ഗോവ): ജയിച്ചാല്‍ പോയിന്റ് ടേബിളിള്‍ മുന്നിലെത്താമായിരുന്ന കേരള ബ്ലാസ്‌റ്റേഴ്‌സ് എഫ്‌സി, ഐഎസ്എല്‍ സീസണിലെ ഒന്‍പതാം മത്സരത്തില്‍ ഗോവ എഫ്‌സിയോട് സമനില വഴങ്ങി (2-2). തുടക്കത്തില്‍ രണ്ടു ഗോളിന് മുന്നില്‍ നിന്ന ശേഷമാണ് ബ്ലാസ്‌റ്റേഴ്‌സ് സമനിലയില്‍ കുരുങ്ങിയത്. ആദ്യപുകുതിയിലായിരുന്നു കളിയിലെ നാലു ഗോളുകളും. പത്താം മിനിറ്റില്‍ ജീക്‌സണ്‍ സിങും 20ാം മിനിറ്റില്‍ അഡ്രിയാന്‍ ലൂണയും ഗോവയുടെ വല കുലുക്കി. ഓര്‍ട്ടിസും (24) എദു ബെഡിയയും (38) ഗോവയ്ക്കായി തിരിച്ചടിച്ചു. സീസണില്‍ ബ്ലാസ്റ്റേഴ്‌സിന്റെ അഞ്ചാം സമനിലയാണിത്. തോല്‍വിയില്ലാതെ തുടര്‍ച്ചയായ എട്ടു മത്സരങ്ങള്‍ പൂര്‍ത്തിയാക്കിയ ബ്ലാസ്റ്റേഴ്‌സ് 9 മത്സരങ്ങളില്‍ നിന്ന് 14 പോയിന്റുമായി പോയിന്റ് പട്ടികയില്‍ വീണ്ടും മൂന്നാം പടിയിലെത്തി. ജനുവരി 9ന് ഹൈദാരാബാദ് എഫ്‌സിക്കെതിരെയാണ് ബ്ലാസ്റ്റേഴ്‌സിന്റെ അടുത്ത മത്സരം

ഗോവയോട് സമനിലയുമായി ബ്ലാസ്‌റ്റേഴ്‌സ് മൂന്നാം സ്ഥാനത്ത് 1641141468177

ജംഷഡ്പൂരിനെതിരെ കളിച്ച ടീമില്‍ ഒരു മാറ്റവുമായാണ് കേരള ബ്ലാസ്റ്റേഴ്‌സ് ഇറങ്ങിയത്. പ്രതിരോധത്തില്‍ ഹോര്‍മിപാമിന് പകരം വി ബിജോയ് എത്തി. ജെസെല്‍ കര്‍ണെയ്‌റോ, മാര്‍കോ ലെസ്‌കോവിച്ച്, ഹര്‍മന്‍ജോത് കബ്ര എന്നിവര്‍ തുടര്‍ന്നു. മധ്യനിരയില്‍ അഡ്രിയാന്‍ ലൂണ, സഹല്‍ അബ്ദുള്‍ സമദ്, പുയ്ട്ടിയ, ജീക്‌സണ്‍ സിങ് എന്നിവര്‍. മുന്നേറ്റത്തില്‍ അല്‍വാരോ വാസ്‌കസ്-ജോര്‍ജ് പെരേര ഡയസ് സഖ്യത്തിനെ തന്നെ ഇവാന്‍ വുകോമനോവിച്ച് പരീക്ഷിച്ചു.വലയ്ക്ക് മുന്നില്‍ പ്രഭ്‌സുഖന്‍ സിങ്. ഗോവയുടെ ഗോള്‍ വല ധീരജ് സിങ് കാത്തു. പ്രതിരോധത്തില്‍ ഇവാന്‍ ഗൊണ്‍സാലെസ്, ഡൈലാന്‍ ഫോക്‌സ്, അയ്ബന്‍ ഡോഹ്‌ളിങ്, സെറിട്ടണ്‍ ഫെര്‍ണാണ്ടസ്, സേവ്യര്‍ ഗാമ എന്നിവര്‍. എദു ബെഡിയ-ഗ്ലാന്‍ മാര്‍ട്ടിന്‍സ്-മുഹമ്മദ് നെമില്‍ സഖ്യമായിരുന്നു മധ്യനിരയില്‍. ദേവേന്ദ്ര മുര്‍ഗയോങ്കറും ജോര്‍ജ് ഓര്‍ട്ടിസും മുന്നേറ്റത്തില്‍.

ഗോവയോട് സമനിലയുമായി ബ്ലാസ്‌റ്റേഴ്‌സ് മൂന്നാം സ്ഥാനത്ത് 1641141287125

കളിയുടെ തുടക്കത്തില്‍തന്നെ ബ്ലാസ്റ്റേഴ്‌സ് വീര്യത്തോടെ പന്ത് തട്ടി. നാലാം മിനിറ്റില്‍ അല്‍വാരോ വാസ്‌കസിന്റെ ലോങ് ബോള്‍ പിടിച്ചെടുത്ത് ജോര്‍ജ് ഡയസ് പെരേര ഗോവന്‍ ഗോള്‍ മുഖത്തേക്ക് മുന്നേറി. ബോക്‌സില്‍ വച്ച് ഡയസ് നല്ല ക്രോസ് തൊടുത്തെങ്കിലും ഗോവന്‍ പ്രതിരോധം തടഞ്ഞു. മൂന്ന് മിനിറ്റിനുള്ളില്‍ അടുത്ത മനോഹര നീക്കം. ഇക്കുറി മധ്യഭാഗത്ത് വച്ച് ജീക്‌സണ്‍ സിങ് പന്ത് നീക്കി വാസ്‌കസിലേക്ക്. വലതുപാര്‍ശ്വത്തില്‍ ഒഴിഞ്ഞുകുതിക്കുകയായിരുന്ന സഹലിലേക്ക് വാസ്‌കസ് പാസ് നല്‍കി. സഹല്‍ ഒന്നാന്തരം നീക്കം നടത്തി. ഇടതുമൂലയില്‍ വച്ച് ഷോട്ട് തൊടുത്തു. പക്ഷേ, നേരിയ വ്യത്യാസത്തില്‍ പുറത്തായി. പിന്നാലെ മറ്റൊരു നീക്കം കണ്ടു. ഇക്കുറിയും ബോക്‌സിലേക്കുള്ള ലോങ് ബോള്‍ ഗോവന്‍ പ്രതിരോധത്തില്‍ തട്ടി തെറിച്ചു. ജീക്‌സണ്‍ ബോക്‌സിന് പുറത്തുവച്ച് കരുത്തുറ്റ അടി തൊടുത്തു. ഗോവന്‍ പ്രതിരോധത്തില്‍ തട്ടി പുറത്തേക്ക്. ഒമ്പതാം മിനിറ്റില്‍ വാസ്‌കസിന്റെ ഷോട്ട് ഗോവന്‍ ഗോള്‍മുഖം വിറപ്പിച്ചു. പ്രതിരോധം കോര്‍ണര്‍ വഴങ്ങി. ബ്ലാസ്റ്റേഴ്‌സ് കാത്തിരുന്ന നിമിഷമെത്തി. ലൂണ ഇടതുവശത്തുനിന്ന് എടുത്ത കോര്‍ണര്‍ കിക്കില്‍ ജീക്‌സണ്‍ മനോഹരമായി തലവച്ചു. ഗോവന്‍ ഗോള്‍ കീപ്പര്‍ ധീരജ് സിങ്ങിന്റെ തലയ്ക്ക് മുകളിലൂടെ പന്ത് വലയില്‍. ലൂണയുടെ കൃത്യതയുള്ള കിക്ക് ജീക്‌സണ് പാകത്തിന് കിട്ടി. ബ്ലാസ്റ്റേഴ്‌സ് പത്താം മിനിറ്റില്‍ മുന്നില്‍.

മറുവശത്ത് ഗോവയ്ക്ക് എളുപ്പത്തില്‍ പന്ത് നീക്കാനായില്ല. പ്രതിരോധം കൃത്യമായി അവരുടെ മുന്നേറ്റങ്ങളെ തടഞ്ഞു. പതിനെട്ടാം മിനിറ്റില്‍ ഗാമയുടെ അപകടകരമായ മുന്നേറ്റത്തെ കബ്ര ബോക്‌സിനുള്ളില്‍വച്ച് തടയിട്ടു. ഇരുപതാം മിനിറ്റില്‍ മറ്റൊരു മിന്നുന്ന ഗോളില്‍ ബ്ലാസ്റ്റേഴ്‌സ് ഗോവയെ തകര്‍ത്തു. ലൂണയുടെ മാന്ത്രിക കാലുകള്‍ 2-0ന്റെ ലീഡ് നല്‍കി. ഈ സീസണിലെ തന്നെ ഏറ്റവും മനോഹര ഗോളായി അത്. ബോക്‌സിന് പുറത്തുവച്ച് ലൂണ പന്ത് കോരിയിട്ടു. ധീരജ് സിങ്ങിനെ കാഴ്ചക്കാരനാക്കി പോസ്റ്റിന്റെ വലതുമൂലയില്‍ തട്ടി പന്ത് വലയിലേക്കൊഴുകി. വാസ്‌കസ് ആണ് ലൂണയ്ക്ക് പാകത്തിന് പന്ത് തട്ടി നല്‍കിയത്.

ഗോവയോട് സമനിലയുമായി ബ്ലാസ്‌റ്റേഴ്‌സ് മൂന്നാം സ്ഥാനത്ത് 1641141271058

മൂന്ന് മിനിറ്റിനുശേഷം ഗോവ ഒരെണ്ണം തിരിച്ചടിച്ചു. ഗാമ ഇടതുവശത്ത് നിന്ന് തൊടുത്ത ക്രോസ് ഓര്‍ടിസ് ഏറ്റുവാങ്ങി. പിന്നോട്ട് തട്ടി, പിന്നെ ബ്ലാസ്റ്റേഴ്‌സ് പ്രതിരോധത്തിന് ഇടയിലൂടെ അടിച്ചു. പ്രഭ്‌സുഖന്‍ ആഞ്ഞുശ്രമിച്ചെങ്കിലും കൈയില്‍ തട്ടി വലയിലെത്തി. ഒരെണ്ണം വഴങ്ങിയെങ്കിലും ബ്ലാസ്റ്റേഴ്‌സിന്റെ ആക്രമണ മൂര്‍ച്ച കുറഞ്ഞില്ല. കൂളിങ് ബ്രേക്ക് കഴിഞ്ഞുള്ള ബ്ലാസ്റ്റേഴ്‌സിന്റെ ആദ്യനീക്കംതന്നെ ഗോവന്‍ ഗോള്‍ മുഖത്തേക്കായിരുന്നു. വലതുഭാഗത്ത് വാസ്‌കസിന്റെ ഗംഭീര കുതിപ്പ്. തകര്‍പ്പന്‍ ക്രോസ്. ഡയസ് അത് ഗോള്‍മുഖത്തേക്ക് കുത്തിയിട്ടു. പക്ഷേ, സഹലിന്റെ ഹെഡര്‍ ലക്ഷ്യത്തിലെത്തിയില്ല. 38ാം മിനിറ്റില്‍ ഗോവ സമനില പിടിച്ചു. ഒളിമ്പികോ ഗോളിലൂടെ എഡു ബെദിയ ഗോവയെ ഒപ്പമെത്തിച്ചു. ബെദിയയുടെ കോര്‍ണര്‍ നേരെ വലയില്‍ കടന്നു. 42ാം മിനിറ്റില്‍ പെരേര ഡയസിനെ ഗോവന്‍താരം ഗ്ലാന്‍ മാര്‍ട്ടിന്‍സ് അപകടകരമായി ഫൗള്‍ ചെയ്‌തെങ്കിലും റഫറി മഞ്ഞക്കാര്‍ഡിലൊതുക്കി. ആവേശകരമായ ആദ്യപകുതി 2-2ന് അവസാനിച്ചു.

ഗോവയോട് സമനിലയുമായി ബ്ലാസ്‌റ്റേഴ്‌സ് മൂന്നാം സ്ഥാനത്ത് 1641141297022

രണ്ടാംപകുതിയുടെ തുടക്കത്തില്‍ ഗോവയ്ക്ക് ഫ്രീകിക്ക് കിട്ടി. എന്നാല്‍ ഓര്‍ട്ടിസിന്റെ ഹെഡര്‍ ക്രോസ് ബാറിന് മുകളിലൂടെ പറന്നു. പിന്നാലെ മുര്‍ഗയോങ്കര്‍ ലക്ഷ്യം കണ്ടെങ്കിലും ഓഫ് സൈഡായി. ഗോവയുടെ മുന്നേറ്റങ്ങളെ ബോക്‌സില്‍ കടക്കാന്‍ ബ്ലാസ്റ്റേഴ്‌സ് അനുവദിച്ചില്ല. 55ാം മിനിറ്റില്‍ ഓര്‍ട്ടിസിന്റെ ക്രോസ് ലെസ്‌കോവിച്ച് ഹെഡ് ചെയ്ത് ഒഴിവാക്കി. അയ്ബന്റെ ലോങ് റേഞ്ച് ഷോട്ട് ലക്ഷ്യത്തിലെത്തിയില്ല. ഗോവയുടെ മറ്റൊരു നീക്കം ബിജോയ് തടഞ്ഞു. 60ാം മിനിറ്റില്‍ ബ്ലാസ്റ്റേഴ്‌സ് ആദ്യ മാറ്റം നടത്തി. സൂപ്പര്‍ താരം ലൂണയെ പിന്‍വലിച്ചു. പകരം ചെഞ്ചോ ഗ്യെല്‍ഷന്‍ ഇറങ്ങി. 66ാം മിനിറ്റില്‍ ചെഞ്ചോയ്ക്ക് കിട്ടിയ മികച്ച അവസരം മുതലാക്കാനായില്ല. 74ാം മിനിറ്റില്‍ രണ്ട് മാറ്റങ്ങള്‍ കൂടി ബ്ലാസ്റ്റേഴ്‌സ് വരുത്തി. പുയ്ട്ടിയക്ക് പകരം ആയുഷ് അധികാരിയും സഹലിന് പകരം കെ പ്രശാന്തും കളത്തിലെത്തി. അവസാന ഘട്ടത്തില്‍ വിജയഗോളിനായി ബ്ലാസ്റ്റേഴ്‌സ് ആഞ്ഞുശ്രമിച്ചു. പ്രതിരോധവും ശക്തിപ്പെടുത്തി. ബെദിയ എടുത്ത ഫ്രീകിക്ക് ബാറിന് മുകളിലൂടെ പറന്നു. അവസാന നിമിഷം വാസ്‌കസിന്റെ മികച്ച ശ്രമം പാഴായി. പരിക്കുസമയത്ത് ജോര്‍ഡ് ഡയസിനെയും ബിജോയിയെയും പിന്‍വലിച്ച് എണെസ് സിപോവിച്ചിനെയും വിന്‍സി ബരെറ്റോയെയും ബ്ലാസ്റ്റേഴ്‌സ് ഇറക്കി.


കൂടുതൽ ഇന്ത്യൻ ഫുട്‌ബോൾ വാർത്തകൾക്കും വിശേഷങ്ങൾക്കും IFTWC ഫോളോ ചെയ്യൂ

LEAVE A REPLY

Please enter your comment!
Please enter your name here